انتفاضة مصر

اليوم.... 6 ابريل, يوم مصر.. اليوم اللي قرر فيه المصريين يقولوا لأ, يقولا احنا هنا, موجودين... يقولوا احنا مش نايمين, يقولوا مصر لسة بخير.

يوم هيشهد عليه التاريخ و يقول كلمته, يقول ان شعب مصر زهق و طق, يقول انه عمر ما وضع المصريين هيفضل بالسوء ده و يقعدوا ساكتين.

اضراب شامل في مصر من كل حته و كل حارة, من كل طبقة و كل الاعمار. الكل قرر يعتصم و يعترض علي كل شئ, كل شئ بيعكر حياته و بيجرده من ادميته و صفته كأنسان, انسان خلقه ربنا حر و عنده كرامه... بس مع الاسف الظروف و الوضع الاقتصادي و التعليمي قال عكس كدة.

الاضراب الشامل في مصر هيكون اضراب سلمي... و ده اللي احنا عاوزينه و ده اللي احنا محتاجينه, محتاجين بس نقول لأ و نببين اد ايه احنا تعبانبن و عاوزين التغيير, و طبعا دع من غير اي عنف و لا عشوائية.

الاضراب هيبقي من كل واحد فينا, كل واحد ليه الدور.. بس ازاي هنقدر نعمل ده: اولا: ماحدش هينزل من بيته و ماحدش هيشتري حاجة في اليوم ده, و زي ما القائمين علي الاضراب ده اكدوا علي الناس يشتروا مستلزماتهم و احتياجتهم ليوم 6 ابريل علشان ماحدش يلجأ انه يشتري حاجة من اي حته لأنه طبعا كل المحلات و الاماكن هتغلق ابوابها.

و المواصلات ماحدش هيستعملها و لا هيقربلها.

بس ليه كل ده؟؟!! هو الشعب تعبان اد كدة؟ اهههه تعبان.

طب من ايه؟!

اقولك انا من ايه...

لما 95% من مساحت مصر تبقي صحراء و يعيش ال 5 % علي شريط النيل, و الناس تتخنئ من الزحمة يبقي لازم يكونوا تعبانبن, لما الوحد علشان يوصل لمكان شغله او جامعته بعد مش اقل من نص ساعة ساعة يبقي لازم الشعب يكون تعبان.

لما ازازة الزيت -اللي هي اساس الاكل- توصل ل 11 جنيه يبقي اكيد الشعب تعبان...

لما الملايين من المصريين يعيشوا في عشوائيات غير صالحة للحياة يبقي لازم يتعب, لما الموظف ياخد 200 جنية في الشهر لمفروض تكفي عياله كلهم يبقي لازم يتعب و يطق ان ما كانش هيموت و... و... و....

لما المصري ياخد بالجزمة من امين شرطة و ياخد علي افاه من ظابط يبقي لازم يتحرك, لما التعذيب في السجون يبقي بالشكل ده و المصريين تضيع كرامتهم و ادميتهم و حريتهم.... يبقي لازم, لازم, لازم يكون ليهم موقف.

دي بعض الاسباب اللي هيه من ضمن الاف الاسباب اللي تخلي المصريين -و اخيرا- بعد سنين و سنين من الصمت و السلبية يقوموا و يتحركوا و يقولوا لأ... احنا هنا, احنا اصحاب حضارة الاف السنين لا يمكن نعيش بالشكل ده. و ينتفضوا بكل عفوية و عقلانية علشان يبينوا جزء من ضيقهم و معاناتهم جوة بلدهم و علي ارضهم اللي دافع جدودهم عنها الاف السنين عشان يحموها و استشهد في سبيل حريتها الاف مؤلفة من الشهداء المصريين الابرار عشان احفادهم -اللي همة احنا- نعيش حياة كريمة و اللي مع الاسف ماعشناهاش.

من كلامي مع سواقين التاكسيات اللي همة من اكبر المعنيين بالاوضاع السيئة في البلد, و كلامهم عن الاضراب و انهم ناوين يضربوا و يقولوا لأ, حسيت فعلا اد ايه الشعب الطيب ده تعبان, و عرفت اد ايه الشعب ده -الغلبان- داقت عليه الدنيا و الكبت اللي جواه قرر اخيرا انه يطلعوا, عشان يحاول يوصل لأبسط حقوقه.

بس اللي عكنن علية تحزير مسئول في وزارة الداخلية لأي شخص هيقوم بالأضراب ده, و انه هيعرض كل اللي يشارك في الموضوع ده نفسه للمسائلة.

طب انا يعني مش فاهم, هوة لما الشعب يقول انه هيعترض بأسلوب سلمي و غير متهور يبقي يتخذر؟!!! و لما الناس اد كدة تعبانة و الحكومة مش عاوزة اضرابات ولا اعتصامات, طب ليه الحكومة ماتغيرش و تحاول توقف كل اللي معكنن علي المصريين عيشتهم. يا جدعان ده الشعب... ازاي الشعب يكون بيعاني بالشكل ده و مانخففش عليه لأ دحنا بنحزروا من الاعتراض... شئ غريب فعلا!.

بس لأ المصريين قرروا و هيقدروا و انا واثق من كدة, واثق انه وعي الشعب السياسي عالي, و يستحق الاحترام. وواثق انه بكرة هيكون يوم مهم في تاريخ النضال الوطني المصري و الشعب هيقول كلمته اما عدم الاضراب و الاعلام عن رضائة علي وضعه في البلد و انه كله جميل و الحياة حلوة -اللي اشك فيه اصلا- او انه يعترض و يضرب و يعتصم و يقول لأ انا وضي غلط ولازم يتغير -وده اللي انا شخصيا بتوقعه. بس انته هل مقتنعين زيي؟؟؟؟

علي العموم كله هيبان بكرة ان شاء الله و ربنا معاكي يا مصر, و معاك يا شعب مصر.

ملحوظة: انتظروا غدا مساءا المقالة الشاملة التي ستغطي هذا اليوم و ما سيجري فيه. و اللي فيه الخير هيقدموا ربنا.